Светското првенство во 2026 година ќе влезе во историјата како најголемиот мундијал досега. За првпат на завршниот турнир ќе настапат 48 репрезентации, а домаќини ќе бидат три држави – САД, Канада и Мексико.
Но, покрај новиот формат, шампионатот ќе биде запаметен и како последна сцена за една генерација фудбалски великани што го обележаа спортот во изминатите две децении.
За многумина од нив, ова ќе биде последната можност да го освојат најпрестижниот трофеј во светот на фудбалот.
Најголемо внимание, секако, ќе привлечат Лионел Меси и Кристијано Роналдо. Аргентинецот, кој во 2022 година конечно ја освои светската титула, би можел по шести пат да настапи на Мундијал, додека Роналдо ќе се обиде да го освои единствениот голем трофеј што му недостига во богатата кариера.
Лука Модриќ, кој ја предводеше Хрватска до финалето во 2018 година и бронзата во 2022 година, исто така ќе има можност уште еднаш да ги воодушеви навивачите на своето петто Светско првенство.
Меѓу фудбалерите кои би можеле да се простат од мундијалите се и Един Џеко, Нејмар, Кевин де Брујне, Дани Карвахал, Вирџил ван Дајк, Антонио Рудигер, Енди Робертсон и легендарниот германски голман Мануел Нојер.
Некои од нив веќе ги освоија најголемите признанија, други сè уште сонуваат за светската круна, но заедничко им е тоа што СП 2026 најверојатно ќе биде нивниот последен настап на најголемата фудбалска сцена.
Без разлика на конечниот исход, нивното заминување ќе означи крај на една незаборавна ера и почеток на ново поглавје во светскиот фудбал.
