По повеќе од пет недели од воведувањето на забраната, во Гостивар се очекува да се создадат услови за повторно користење на водата за пиење и подготовка на храна. Одлуката ќе зависи од последните лабораториски резултати, кои треба да потврдат дека водата е безбедна.
Од локалниот кризен штаб во изминатите денови информираа дека состојбата значително се подобрува. Според досегашните анализи, микробиолошките параметри на водата се во границите, додека концентрацијата на хлор постепено се нормализира.
За официјално укинување на забраната потребни се три последователни анализи со резултати кои ќе покажат дека водата ги исполнува сите услови за пиење и подготовка на храна. Мостри се земаат на секои 12 часа од страна на три лаборатории.
Последните добиени резултати, според координаторот на Кризниот штаб во Гостивар, Зуди Џелили, покажале дека водата е исправна според физичките, хемиските и микробиолошките параметри. Се очекуваат и резултатите од мострите земени во текот на вчерашната вечер.
„Доколку и вечерните резултати ја потврдат исправноста на водата, ние како локален кризен штаб ќе имаме можеби прес со членови од централниот кризен штаб и ќе им соопштиме на граѓаните дека дефинитивно водата е добра за пиење од водоснабдителниот систем во Општина Гостивар“, изјави Џелили.
Иако резултатите се охрабрувачки, од надлежните апелираат граѓаните да не ја користат водата за пиење и подготовка на храна сè додека Агенцијата за храна и ветеринарство официјално не ја укине забраната.
Забраната беше донесена на 17 јули, откако во водата беше утврдена фекална загаденост и зголемено присуство на хлор. Токму АХВ е институцијата која треба да донесе одлука за нејзино укинување.
Покрај квалитетот на водата, надлежните најавуваат и продолжување на контролите во наредниот период, како и активности за подобрување на притисокот во делови од градот каде што водоснабдувањето е отежнато.
Во меѓувреме, останува отворено прашањето зошто досега не се објавени целосните лабораториски резултати од почетокот на кризата, иако водата повеќе од три недели се контролира секојдневно од повеќе мерни места и во три лаборатории.
Кризата со водоснабдувањето предизвика здравствени проблеми кај околу 5.000 жители. Во рамките на истрагата за загадувањето, во притвор се Артана Асани, Леон Уредини и Вадедин Дервиши, поранешни раководни лица во ЈП „Комуналец“. Тие се осомничени дека со свои дејствија поврзани со водоснабдителниот систем овозможиле мешање на загадена вода со водата наменета за пиење.
