Обидот за извршување на смртната казна врз Криста Пајк во американската сојузна држава Тенеси завршил безуспешно, откако затвореничката преживеала две дози пентобарбитал. По повеќе од еден час, затворските власти ја прекинале постапката, а Пајк била пренесена во болница во критична состојба.
Погубувањето било закажано на 30 септември во државниот затвор „Ривербенд“ во Нешвил. Седум новинари кои биле присутни како сведоци го опишале настанот како исклучително невообичаен, при што завесите во просторијата за погубување биле затворени, а подоцна на сведоците им било наредено да ја напуштат просторијата.
Пред почетокот на постапката, Пајк имала можност да ги каже последните зборови. Таа изјавила дека светот го напушта со љубов и дека чувствува мир и е подготвена да замине.
Првата доза пентобарбитал била дадена во 19:34 часот. Набрзо Пајк се пожалила на силна болка во раката. Сведоците забележале дека длабоко вдишувала, ги движела нозете и покажувала други знаци дека сè уште е свесна.
Во 19:46 часот, бидејќи Пајк сè уште била жива, завесите меѓу просторијата за погубување и просторијата за сведоци биле затворени. По околу три минути повторно биле отворени, но затвореничката и понатаму покажувала знаци на живот.
Сведоците продолжиле да слушаат звуци од просторијата, а новинарите опишале дека Пајк тешко дишела и испуштала звуци на ’рчење. Во 20:05 часот завесите повторно биле затворени, но овојпат не биле отворени.
Речиси 50 минути подоцна, во 20:53 часот, микрофонот во просторијата за погубување бил исклучен, а управникот на затворот им наредил на сведоците да ја напуштат просторијата.
Набрзо пред затворот пристигнале возила на итната медицинска помош. Според Врховниот суд на Тенеси, Пајк била пренесена во болница за итна медицинска помош.
Нејзините адвокати следниот ден потврдиле дека е жива и се наоѓа во критична состојба, подложена на интензивна медицинска нега за спасување на животот. Тие побарале гувернерот на Тенеси, Бил Ли, да ја преиначи смртната казна.
Државните власти не објавиле детални информации за нејзината состојба повеќе од 24 часа по прекинот на постапката. Гувернерот Ли изјавил дека не бил запознаен со нејзината моментална здравствена состојба, но изразил длабоко разочарување поради неуспешното погубување, оценувајќи го настанот како трагедија.
Ова е втор неуспешен обид за извршување смртна казна во Тенеси во период од четири месеци. Случајот повторно ги отвори прашањата за начинот на кој државата ја спроведува смртната казна, како и за уставноста на смртоносната инјекција.
Според извештајот на „USA Today“, државниот протокол не предвидува конкретна постапка за случај во кој ниту една од двете дози не резултира со смрт, а вакво сценарио досега не било забележано во историјата на извршувањето смртни казни со смртоносна инјекција во САД.
Новинарите кои го следеле целиот процес го опишале настанот како целосно отстапување од вообичаената практика, со оценка дека постапката била хаотична и дека голем дел од случувањата зад затворените завеси останале непознати за сведоците.
