Поради силното невреме што попладнево го зафати Скопје, преку Единствениот повикувачки број за итни случаи 112 се примени повеќе пријави за поплави и проблеми во сообраќајот.
Според информациите, поплавени се два подвозника – пред кружниот тек во Бутел и на булевар „Србија“ во Општина Кисела Вода, каде што има и заглавени возила.
Проблеми се пријавени и на кружните текови кај „Ист гејт“ и Железара во Општина Гази Баба, како и кај Мото Центар и Цементара во Кисела Вода.
Поплавена е и улицата „Јордан Мијалков“, зад трговскиот центар „Дајмонд мол“.
Пријавени се и поплавени куќи, подрумски простории и гаражи во населбите Кисела Вода, Автокоманда и Чаир.
Дополнително, пријавени се поплавен магацин на „Веро“ во Чаир, како и магацин на приватна компанија во Кисела Вода.
Поплавени се и паркинзи и пристапни улици во населбата Расадник во Кисела Вода, како и во населбата Аеродром.
Поради поплавените улици, кружни текови и подвозници, сообраќајот во повеќе делови од Скопје е значително отежнат, а на одредени локации движењето на возилата е целосно прекинато.
