Силното невреме што го зафати Скопје предизвика поплави на повеќе локации, оштетувања на инфраструктурата и проблеми во одвивањето на сообраќајот, покажува извештајот на Центарот за управување со кризи (ЦУК).
Според податоците добиени преку Единствениот број за итни повици 112 и надлежните институции, поплавени се два подвозника, три кружни текови, повеќе од осум улици и пет населби – Кисела Вода, Автокоманда, Чаир, Аеродром и Горно Лисиче.
Пријавени се и повеќе поплавени куќи, подрумски и гаражни простории, два магацини, како и поплавен објект на Македонската академија на науките и уметностите (МАНУ).
Меѓу критичните точки се издвојуваат подвозникот пред кружниот тек во Бутел, подвозникот на булеварот „Србија“, кружните текови кај „Ист Гејт“, Мото Центар, Цементара и Железара, како и улицата „Јордан Мијалков“ зад „Дајмонд Мол“. Поплавени се и паркинзи и внатрешни сообраќајници во населбите Расадник и Аеродром.
ЦУК предупредува дека е забележано покачено ниво на Усјанскиот канал и на реката Серава во Бутел, при што постои ризик од нивно прелевање.
Според проценката на Центарот за управување со кризи, најпогодени од невремето се општините Кисела Вода, Гази Баба, Бутел, Чаир и Аеродром, каде што се регистрирани најголем број пријави за поплавени домови, подруми, гаражи и сообраќајници.
На терен интервенираат територијалните противпожарни единици, Дирекцијата за заштита и спасување, јавните комунални претпријатија, општинските служби, „Македонија пат“ и други надлежни институции, кои работат на расчистување на последиците и нормализирање на состојбата.
Граѓаните кои претрпеле материјални штети од неодамнешното невреме треба да поднесат барање до општинските комисии за процена на штети, информираат од Центарот за управување со кризи (ЦУК).
По приемот на барањата, надлежните комисии ќе излезат на терен, ќе извршат увид и ќе направат процена на настанатите оштетувања.
Од ЦУК посочуваат дека сите дополнителни информации во врска со постапката и процената на штетите граѓаните можат да ги добијат директно од општинските комисии.
