Повеќе загинати во пожар во семејна куќа во Ирска, меѓу нив и деца

Повеќе лица загинале во пожар што избувнал утринава во семејна куќа во Вотерфорд, град на југоистокот на Ирска, потврди ирската полиција. Според информациите на локалната радио станица „WLR FM“, меѓу загинатите има и деца, но засега не е соопштен точниот број на жртви.

— реклама —

Пријавата за пожарот била примена околу 5:13 часот по локално време. Огнот избувнал во двокатна куќа на улицата Бирч авенија, во населбата Бирчвуд, во областа Килкохан. На местото пристигнале повеќе противпожарни екипи од околните станици, кои затекнале пожар што веќе бил во напредна фаза.

Пожарникарите започнале со гаснење и од објектот извлекле неколку настрадани лица. Откако огнот бил изгаснат, местото им било предадено на полициските служби.

— реклама —

На социјалните мрежи се појавиле непотврдени тврдења дека загинале три деца и едно возрасно лице, како и сомневања дека пожарот можеби бил подметнат. Ирската полиција засега не ги потврди овие информации.

— реклама —

„Бидејќи интервенцијата сè уште трае и ситуацијата се развива, во моментов не можеме да соопштиме повеќе детали“, информирале од полицијата.

Причините за избувнувањето на пожарот сè уште не се разјаснети. Локалните медиуми претходно објавија дека на 18 септември во истата населба бил намерно запален автомобил. Полицијата тогаш отворила истрага, но засега нема потврда дека двата инцидента се поврзани.