Вработен во Националниот музеј на Ирска е обвинет за кривични дела поврзани со експлозив, откако полицијата запрела автомобил во кој била пронајдена бомба подготвена за употреба, додека се движел од Република Ирска кон Северна Ирска.
Според истрагата, во багажникот на возилото била пронајдена торба со целосно составена експлозивна направа, тајмер, детонатор и материја за која се сомнева дека е експлозивот Семтекс.
Полицијата соопшти дека 44-годишниот Сајмон О’Донован бил уапсен во средата во близина на округот Монаган, а акцијата била дел од операција насочена против активности на дисидентски републикански групи. Истражителите сметаат дека возилото било на пат кон Северна Ирска со намера да се изврши напад.
Во случајот е обвинета и 25-годишната Изобела Пери Саливан, приправничка во адвокатска канцеларија, која според обвинителството го управувала автомобилот. Нејзиниот адвокат тврди дека таа била изманипулирана и дека не знаела што се наоѓа во торбата што требало да ја пренесе.
Саливан е пуштена да се брани од слобода со кауција, при што ѝ е одземен пасошот и ѝ е одредена полициска забрана за движење во одредени часови. Одлуката предизвика критики од политичари, кои сметаат дека сериозноста на случајот барала притвор.
Полицискиот комесар Џастин Кели изјави дека заплената е „исклучително значајна“ и резултат на разузнавачка операција, а не на случајна контрола.
И покрај мировниот договор од Велики петок од 1998 година, во Ирска и натаму дејствуваат помали дисидентски републикански групи, кои повремено се поврзуваат со напади со импровизирани експлозивни направи.
