Пожар беснее на грчкиот остров Евија, испратено предупредување за можна евакуација

Голем пожар избувна денеска на грчкиот остров Евија, во подрачје со земјоделско земјиште и шума во близина на местото Лата, во општинската единица Таминеи, недалеку од Аливери.

— реклама —

Според грчката противпожарна служба, огнот избувнал околу пладне, а во негова близина се наоѓаат и повеќе расфрлани станбени објекти.

Во гаснењето на пожарот се вклучени 65 пожарникари, два специјализирани тима за шумски пожари, 18 противпожарни возила, шест авиони и три хеликоптери, од кои еден ја координира акцијата од воздух. Поддршка обезбедуваат и цистерни со вода, ангажирани од општината Кими-Аливери.

— реклама —

Грчките власти преку системот 112 испратија итно предупредување до жителите на поширокото подрачје, повикувајќи ги да бидат подготвени за евентуална евакуација, бидејќи пожарот се приближува до населените места.

— реклама —

Според картата за процена на ризик, регионот денес се наоѓа под трет степен на опасност, што означува висок ризик од појава и ширење шумски пожари.

Од противпожарната служба соопштија дека пожарот бил забележан со надзорен дрон, кој во реално време испраќа снимки од теренот за подобра координација на гаснењето.

— реклама —

На местото на пожарот е испратена и специјална истражна единица, која треба да ги утврди причините за избувнувањето на огнената стихија.