Голем пожар избувна денеска во селото Ини, во близина на Ираклион на грчкиот остров Крит, по што беа мобилизирани копнени и воздушни противпожарни сили за негово локализирање.
Според грчките медиуми, огнот избувнал околу 11 часот по локално време во трска и ниска вегетација, а потоа се проширил и на земјоделски површини. Засега нема информации дека се загрозени куќи или друга инфраструктура.
Во гаснењето на пожарот учествуваат 45 пожарникари со 11 противпожарни возила, а од воздух интервенира и еден хеликоптер.
Работата на противпожарните екипи дополнително ја отежнува силниот ветер, кој придонесува за ширење на огнената стихија.
На местото на настанот е испратен и тим за истрага на подметнати пожари од Ираклион, кој треба да ги утврди причините за избувнувањето на пожарот.
