Пожарите веќе трет ден беснеат во неколку делови на Грција, а најтешка останува состојбата во јужниот дел на Ретимно, на островот Крит. Пожарникарите, со поддршка од голем број копнени сили, се обидуваат да го стават под контрола главниот пожар во областа Агија Параскеви, додека во меѓувреме избувна и нов пожар во регионот Аркадија.
Според грчките медиуми, пожарот на островот Парос повторно се разгорел, што дополнително ги отежнува напорите на службите.
Од Координативниот центар соопштуваат дека силниот ветер и непристапниот терен значително го отежнуваат гаснењето на пожарот во Ретимно, поради што огнот постојано се реактивира и се шири кон нови подрачја.
Во акцијата се вклучени бројни противпожарни екипи од целиот Крит, специјални пешадиски единици и механизација испратена од копното. Помош даваат и жителите на погодените населби, волонтери, цистерни со вода и градежна механизација од локалните самоуправи во Агиос Василиос, Амари, Ретимно и јужниот дел на Ираклион.
Поради исклучително високата опасност од нови пожари, грчките власти воведоа привремена забрана за движење и престој на граѓани во одредени шумски подрачја во близина на Патра.
Мерката е во сила од 21:00 до 06:00 часот и се однесува на повеќе шумски патишта и заштитени зони. Од забраната се изземени постојаните жители, вработените, сопствениците на земјиште, сточарите и лицата што ги користат главните сообраќајници.
Во меѓувреме, нов шумски пожар избувна во областа Фалаиси, во општината Мегалополис, во Аркадија. Според противпожарната служба, дојавата била примена околу 23:10 часот, по што на терен биле испратени 48 пожарникари, три пешадиски единици и 12 противпожарни возила.
