Пожарите во Грција однесоа три животи, продолжува битката со пламените јазици на Крит

Грчките пожарникари и во текот на ноќта продолжија со гаснењето на големиот пожар на островот Крит, додека земјата ја потресе трагедија во која загинаа тројца припадници на противпожарната служба.

— реклама —

Двајца пожарникари ги загубија животите на Крит откако биле заробени од огнената стихија во близина на местото Неа Крија Вриси, во регионот Ретимно. Нивните тела биле пронајдени во службеното возило. Едниот бил сезонски пожарникар, а другиот пет години работел во противпожарната станица Агиа Фотини.

— реклама —

„Денес е исклучително тежок ден за противпожарната служба“, соопштија надлежните, изразувајќи сочувство до семејствата и колегите на загинатите.

Трет пожарникар починал на полуостровот Пелопонез. Тој бил пронајден во бессознание надвор од опожареното подрачје во местото Агеранос, по што бил пренесен во болница, каде што подоцна им подлегнал на повредите.

— реклама —

Во меѓувреме, властите евакуирале 51 лице од јужниот брег на Крит откако тие се обиделе да се спасат бегајќи кон морето. Спасувачките операции се отежнати поради силниот ветер, кој достигнува јачина од осум степени според Бофоровата скала.

— реклама —

Пожари и понатаму беснеат и на островот Парос во Кикладскиот архипелаг. Поради опасноста, грчката служба за цивилна заштита преку системот 112 повторно издаде предупредување за жителите на неколку населени места.