Пожари беснеат во Црна Гора: Пожарникарите од рано утрово на терен, се гасне и од воздух

Пожарите во Црна Гора и натаму се активни на повеќе локации, а пожарникарите од раните утрински часови се борат со огнената стихија и од земја и од воздух. Најкритично е на подрачјата на Херцег Нови, Улцињ, Никшиќ и Котор, додека пожарот на планината Лисинј во Бар е локализиран.

Црногорскиот министер за внатрешни работи Данило Шарановиќ изјави дека се ангажирани сите расположливи капацитети, при што силите постојано се пренасочуваат кон местата каде што помошта е најпотребна.

— реклама —

Приоритет е заштитата на животите на граѓаните, домовите и природните богатства, а потоа целосно ставање на пожарите под контрола.

Во Херцег Нови активен е пожарот на потегот Баошиќи – Бијела – Зеленика, додека во Улцињ гори на подрачјето Владимир – Клезна – Гач – Зогање – Бриска Гора. Пожари има и кај Кусиде и Штреке во Никшиќ, како и во Драгаљ во Општина Котор.

— реклама —

На пожарот кај Улцињ се ангажирани авионот „Антонов АН-32П“ и хеликоптер на Војската на Црна Гора. Во Херцег Нови дејствуваат два авиони „АТ-802“ на Министерството за внатрешни работи, од кои едниот бил пренасочен од Улцињ.

— реклама —

„Воздухопловните сили ги користиме максимално, но секогаш во согласност со проценката на теренот и безбедносните услови за нивно дејствување“, изјави Шарановиќ.

Во гаснењето се вклучени и припадници на Војската на Црна Гора – 14 војници, три противпожарни возила и две товарни возила.

Од друга страна, командирот на Службата за заштита и спасување во Никшиќ, Славко Тадиќ, соопшти дека поголемите шумски пожари кои неколку дена беа активни во ова подрачје се ставени под контрола и може да се сметаат за изгаснати.

Тој оцени дека непрекинатиот ангажман на пожарникарите на исклучително тешки и непристапни терени дал резултат, по што екипите сега можат да одморат.