Пожарот кај Чаниште е сè уште активен, но засега не ги загрозува населените места

Пожарот што во понеделникот попладне избувна во атарот на прилепското село Чаниште и натаму е активен, но во моментов не претставува директна опасност за населените места, информираше директорот на Дирекцијата за заштита и спасување, Стојанче Ангелов.

Тој посочи дека кон селото Крушевица е воспоставена добра одбранбена линија, а во моментов нема активен крак од пожарот што се движи во тој правец. Во текот на ноќта пожарникарите и тимовите на теренот на повеќе места успеале да го пресечат огнот.

— реклама —

На битолската страна, кон селото Орле, активен е еден крак на пожарот на кој интервенираат битолските пожарникари, а ангажиран е и тежок булдожер за изработка на противпожарна пресека.

Од страната на Чаниште и Крушевица интервенираат прилепските пожарникари, со поддршка на специјализираните тимови на Дирекцијата, противпожарните тимови и доброволни пожарникари од Битола, Кочани и Виница.

— реклама —

Ангелов информираше дека од пожарната линија, која на почетокот била долга повеќе од 20 километри, голем дел е пресечен и повеќе нема непрекината линија на горење. Во гаснењето значајна помош дал и полицискиот хеликоптер, особено на непристапните делови.

— реклама —

„Генерално, состојбата е стабилна, што не значи дека не може да се влоши во кој било момент“, рече Ангелов, додавајќи дека главниот приоритет е заштитата на населените места.

Од пожарот досега биле одбранети неколку манастири, трла и пчеларник. Ангелов упати апел до граѓаните кои имаат куќи во напуштени или полунаселени села и викендички да направат земјен појас околу објектите, бидејќи, како што посочи, „земјата не гори“.

Според него, во Чаниште нема изгорено ниту една куќа во која живеат жители, иако огнот зафатил повеќе стари и напуштени куќи.

Ангелов најави дека пожарот најверојатно ќе продолжи и во текот на утрешниот ден, а трите ретрактори на Дирекцијата веќе се вклучени во интервенцијата. Основната цел останува одбраната на населените места, особено старите и во најголем дел напуштени или полунаселени села.