Пожарот што денеска околу 13:30 часот избувнал во близина на прилепското село Чаниште брзо се проширил кон населеното место, каде што огнот навлегол меѓу куќите, информира директорот на Дирекцијата за заштита и спасување, Стојанче Ангелов.
Според неговите информации, во селото денес живеат само десетина возрасни жители, а голем дел од куќите се стари и напуштени. Огнот зафатил најмалку една куќа што се користела за живеење, а постои можност да се оштетени и повеќе објекти. Изгорела и една релативно нова штала.
Прилепските пожарникари успеале да го сопрат ширењето на огнот низ селото и да спречат поголема катастрофа. Сепак, пожарот потоа се проширил во два спротивни правци надвор од селото, каде што гори сува трева, трње и суви грмушки.
Ангелов веднаш го ангажирал тимот за брз одговор на ДЗС од Битола. На терен пристигнале околу 20 доброволци од Доброволното противпожарно друштво „Архангел“ од Битола, кои се вклучиле во гаснењето на едниот крак од пожарот.
„Овој пожар има капацитет да прерасне во еден од најголемите пожари во оваа пожарна сезона“, предупреди Ангелов, посочувајќи дека теренот е претежно карпест, со стрмни долови, многу трња, сува трева и друга лесно запалива вегетација.
Во пожарот биле вознемирени и неколку жители кои вдишале чад. Екипи на прва помош интервенирале на терен, а според Ангелов, две жени кои биле погодени од чадот сега се чувствуваат добро.
Од пожарот е зафатена и електрична бандера, поради што екипите на ЕВН биле известени за можноста селото да остане без електрична енергија.
Ангелов повторно апелираше до граѓаните да бидат особено внимателни, предупредувајќи дека „доволно е само една искра за вистинска катастрофа“.
