Пожарот на Халкидики ставен под контрола: 481 лице спасено од плажата во Сивири

Големиот шумски пожар што го зафати подрачјето на Сивири, на првиот крак на Халкидики, е ставен под контрола по тешката интервенција на противпожарните и спасувачките служби. Пожарот предизвика масовна евакуација на жители и туристи, а стотици луѓе беа спасувани директно од плажите со бродови и други пловила.

Во големата поморска спасувачка операција од плажата во Сивири биле евакуирани вкупно 481 лица. Во акцијата учествувале два брода на крајбрежната стража, два брода на противпожарната служба, три рибарски бродови, приватни пловила и еден глисер.

— реклама —

Од евакуираните, 285 лица биле пренесени во Сани, додека уште 196 се качиле на бродот „Спидрунер џет“ и безбедно биле транспортирани до пристаништето во Солун.

Во загрозеното подрачје и понатаму остануваат бродови на крајбрежната стража, противпожарната служба и приватни пловила, како превентивна мерка доколку повторно биде потребна интервенција.

— реклама —

Гаснењето на пожарот било значително отежнато поради силниот ветер. Регистрирана е материјална штета на куќи, како и на објекти од биолошкиот третман во подрачјето. Во текот на интервенцијата полесно биле повредени и двајца пожарникари.

Паралелно со гаснењето и евакуацијата, започнало и организирањето привремено сместување за луѓето кои морале да ги напуштат своите домови или местата каде што престојувале.

— реклама —

Хотелиерите од Халкидики и Солун понудиле слободни соби за погодените. Во соработка со Министерството за туризам и службите за цивилна заштита, активирана е платформата на Грчката хотелска комора преку која хотелите можат да пријават колку слободни соби имаат за привремено сместување.

Ситуацијата ја отежнува и големата туристичка посетеност на Халкидики. Поради празникот на 15 август, пополнетоста на хотелите во регионот е околу 90 отсто, поради што Здружението на хотелиери на Халкидики побарало помош и од колегите во Солун за да се обезбедат потребните капацитети.

Во меѓувреме, отворени се и повеќе места за собирање и привремено засолниште во Касандра и Калитеа, меѓу кои цркви, стадиони, затворени спортски сали и општински паркинг.

Локалните власти апелираат жителите и туристите да ги следат инструкциите преку бројот 112, како и насоките на противпожарната служба, полицијата и цивилната заштита. Општина Касандра соопшти дека останува во целосна оперативна подготвеност и дека дополнителни информации ќе бидат објавувани во зависност од развојот на ситуацијата.