Пожарот кој вчера навлезе од косовска страна на територијата на Македонија денеска се наоѓа над селото Грачани и претставува закана за населеното место, информира директорот на Центарот за управување со кризи, Стојанче Ангелов.
Во моментот над Грачани дејствуваат двата „ер-трактори“ на Дирекцијата за заштита и спасување, додека на терен се распоредени и скопски пожарникари. Воздушната поддршка е насочена кон пресекување на огнената линија над селото, со цел да се спречи огнот да продолжи кон населеното место.
„Очекувам огнот да биде пресечен над селото за тоа да не претставува закана за ова убаво село“, рече Ангелов.
Тој информираше дека активни се и два пожара на територијата на Општина Студеничани, кои, според него, биле повторно запалени утрово или во текот на ноќта. Тие во моментов не претставуваат закана за населените места, а се очекува да бидат ставени под контрола.
Како најтежок пожар во моментот, Ангелов го посочи пожарот што се шири меѓу општините Струга и Кичево. Во текот на утрото таму дејствувал армиски хеликоптер како поддршка на пожарникарите од Струга.
Ангелов очекува денеска да биде прекината огнената линија и пожарот да престане да претставува закана за селата во тој регион.
Тој упати апел до граѓаните да бидат особено внимателни, нагласувајќи дека опасноста од пожари останува исклучително висока сè додека не падне дожд.
„Доволно е само една искра за вистинска катастрофа“, предупреди Ангелов, додавајќи дека има најави за дожд во вечерните часови и за утре попладне и вечер.
Според него, вчера биле регистрирани повеќе од 40 пожари на отворен простор.
