Пожарот во Сивири остави огромна штета, властите стравуваат од повторно активирање на жариштата

Иако големиот пожар што го зафати Сивири на Халкидики е ставен под контрола, опасноста од ново разгорување сè уште не е целосно помината. На терен остануваат стотици пожарникари, а особена загриженост предизвикуваат најавените силни ветрови, кои може повторно да активираат преостанати жаришта.

Огнот избувна на 13 август во областа Сивири, на првиот крак на Халкидики, и поради силниот ветер брзо почна да се шири кон населените места. Грчките власти преку системот 112 издадоа повеќе предупредувања до жителите и туристите да се оддалечат од загрозените подрачја.

— реклама —

Во гаснењето беа ангажирани повеќе од 120 пожарникари, пешадиски тимови и десетици противпожарни возила, а од воздух интервенираа авиони и хеликоптери. Во акцијата учествуваа и пожарникари од Молдавија преку европскиот механизам за цивилна заштита.

Брзото ширење на огнот предизвика и голема евакуација. Крајбрежната стража со бродови од плажите во загрозеното подрачје евакуираше 481 лице, додека дел од жителите и туристите беа пренасочени кон побезбедни локации.

— реклама —

Пожарот предизвика материјална штета на повеќе куќи и јавни објекти, меѓу кои и локалната станица за прочистување на отпадни води. При гаснењето биле повредени и двајца пожарникари.

— реклама —

Најголем предизвик сега се временските услови. Се очекуваат силни ветрови со брзина која може да надмине 100 километри на час, што може да доведе до повторно активирање на жариштата и ново загрозување на населените места.

Огнот зафати и значаен шумски појас во централниот дел на Касандра, познат по медитеранските борови. Ова подрачје веќе беше погодено од големиот пожар во 2006 година, што дополнително ја зголемува загриженоста за состојбата на шумскиот фонд.

— реклама —

Поради зголемената опасност од нови пожари, грчките власти воведоа ограничувања за движење на пешаци и возила во одредени шумски подрачја на Касандра и Ситонија. За непочитување на забраните е предвидена глоба од 300 евра.

Состојбата на теренот продолжува внимателно да се следи, особено поради големата туристичка посетеност на Халкидики во овој период.