Познати речиси сите кандидати за изборите во БиХ, опозицијата во Република Српска се договори во последен момент

Политичките партии во Босна и Херцеговина денеска го имаат последниот рок до Централната изборна комисија да ги достават кандидатските листи за општите избори што ќе се одржат на 4 октомври. По проверката и потврдата на кандидатурите, официјалните листи ќе бидат објавени до 20 август.

— реклама —

Најголемо внимание привлече договорот на опозициските партии во Република Српска, кој беше постигнат непосредно пред истекот на рокот. Градоначалникот на Бања Лука, Драшко Станивуковиќ, објави дека се повлекува од кандидатурата за претседател на Република Српска и ќе го поддржи Бранко Блануша, кандидат на Српската демократска странка (СДС).

„Единството на опозицијата ни е на прво место“, изјави Станивуковиќ, ставајќи крај на повеќемесечните несогласувања меѓу опозициските партии.

— реклама —

Блануша ќе се соочи со кандидатот на СНСД, актуелниот премиер на Република Српска, Саво Миниќ. Во трката за српски член на Претседателството на БиХ ќе учествува Маринко Божовиќ, кој ќе се соочи со актуелната членка на Претседателството, Жељка Цвијановиќ, додека кандидатура најави и Небојша Вукановиќ.

— реклама —

Лидерот на СНСД, Милорад Додик, поради правосилната судска пресуда нема право да се кандидира на изборите, но неговиот син Игор Додик ќе биде кандидат за парламентот на Република Српска.

Кај хрватскиот политички блок кандидат на ХДЗ БиХ е Даријана Филиповиќ, коалицијата предводена од ХДЗ 1990 го поддржува Зденко Лучиќ, а Демократскиот фронт го кандидира Славен Ковачевиќ.

— реклама —

За бошњачки член на Претседателството повторно ќе се соочат актуелниот претседавач Денис Беќировиќ и лидерот на СДА, Бакир Изетбеговиќ. Во трката ќе учествува и Семир Ефендиќ, лидер на Странката за БиХ.