Љубителите на производите на „Епл“ би можеле да се соочат со значително повисоки цени кога на пазарот ќе пристигне новиот „ајфон 18 Про“, бидејќи растечките трошоци за меморија и складирање податоци продолжуваат да вршат притисок врз производството на компанијата.
Според нови процени, следната генерација на премиум паметни телефони на „Епл“ би можела да има почетна цена од 1.399 долари или дури и повеќе, што би претставувало едно од најголемите поскапувања во последните години.
Американскиот весник „Волстрит џурнал“, во соработка со истражувачката компанија „ТекИнсајтс“, анализирал колку би можеле да чинат компонентите на новиот уред. Според нивните пресметки, „ајфон 18 Про“ најверојатно ќе започнува со цена од најмалку 1.299 долари, додека почетна цена од 1.399 долари станува сè поверојатна доколку компанијата ги вгради сите планирани хардверски подобрувања.
Главниот извршен директор на „Епл“, Тим Кук, неодамна изјави дека компанијата сè уште ги разгледува можностите поврзани со идните корекции на цените на производите.
Меѓу причините за очекуваното поскапување се повисоките цени на РАМ-меморијата и уредите за складирање податоци, како и најавените значителни подобрувања на камерите. Аналитичарот за синџирите на снабдување, Минг-Чи Куо, претходно процени дека новиот систем на камери би можел да биде околу 50 проценти поскап од оној што се користи во актуелните модели.
Според анализите на „ТекИнсајтс“, „Епл“ остварил бруто-профитна маржа од околу 47 проценти на моделот „ајфон 17 Про“, чија почетна цена изнесуваше 1.099 долари. За да ја задржи сличната профитабилност и покрај зголемените производствени трошоци, компанијата би требало да го продава новиот модел за околу 1.371 долар. Бидејќи „Епл“ традиционално користи заокружени цени, аналитичарите сметаат дека најверојатната почетна цена ќе биде 1.399 долари.
Доколку тоа се оствари, моделот „ајфон 18 Про Макс“ би можел да стартува со цена од 1.499 долари, задржувајќи ја вообичаената разлика од 100 долари меѓу двата модели. Во меѓувреме, долгонајавуваниот модел „ајфон Ултра“ би можел да се приближи до границата од 2.000 долари, што би го направило најскапиот паметен телефон во понудата на „Епл“ досега.
