Антонио Милошоски од ВМРО-ДПМНЕ, на денешната пре-конференција обвини дека шефот на ОЈО ГОКК, Ислам Абази, донел политички мотивирана одлука за затворање на предметот поврзан со набавка на мазут, вреден 167 милиони евра.
На прес-конференција, Милошоски изјави дека со одлуката за запирање на постапката, правдата повторно била ставена „во служба на СДСМ и ДУИ“.
Тој тврдеше дека Абази, како шеф на обвинителството, имал законска можност да одлучи предметот да продолжи или да биде предаден на друг обвинител, но наместо тоа дал согласност случајот да биде затворен.
„Ислам Абази наместо да биде обвинител кој ќе гони организиран криминал и корупција, си ја препишал улогата на судија“, рече Милошоски.
Според него, во македонското правосудство досега немало случај предмет од висок јавен интерес и со сомнежи за криминал од таков обем да биде затворен пред да стигне до судска постапка.
Милошоски посочи дека обвинителството претходно барало притвор за лица опфатени во предметот, а сега, како што рече, тврди дека нема основ за продолжување на постапката.
Тој оцени дека ваквото постапување дополнително ја намалува довербата на граѓаните во правосудниот систем и побара Абази да поднесе оставка од функцијата шеф на ОЈО ГОКК.
Во изјавата Милошоски ги спомена и Венко Филипче, Али Ахмети и Зоран Заев, тврдејќи дека тие имаат влијание во делови од обвинителството и судството.
