Дури и доколку САД и Иран избегнат нова ескалација и дојде до трајно примирје, светската економија би можела уште долго да ги чувствува последиците од кризата во Персискиот Залив, предупредуваат експерти за енергетика и транспорт.
Според анализата на „Дојче веле“, повторното отворање на Хормушкиот теснец нема автоматски да значи стабилизација на пазарите. Иако голем број политичари и инвеститори очекуваат брз пад на цените на нафтата и гасот, водечките луѓе во енергетскиот и бродскиот сектор предупредуваат дека закрепнувањето може да трае со месеци, па дури и со години.
Извршниот директор на саудискиот нафтен гигант „Арамко“, Амин Насер, оценил дека дури и ако теснецот веднаш биде целосно отворен за сообраќај, на пазарот ќе му бидат потребни повеќе месеци за повторно да се стабилизира. Доколку блокадите потраат уште неколку недели, целосната нормализација би можела да се пролонгира до 2027 година.
Во меѓувреме, цените на нафтата остануваат околу 30 проценти повисоки од периодот пред конфликтот, што директно се одразува врз цените на горивата, транспортот, вештачките ѓубрива и храната.
Дополнителен проблем претставува недовербата кај бродските компании, кои и понатаму стравуваат од нови напади во регионот. Осигурителните премии за пловидба низ Хормушкиот теснец остануваат високи, а експертите проценуваат дека ќе бидат потребни најмалку неколку недели стабилност пред бродовите повторно масовно да се вратат на оваа рута.
Сериозни штети се регистрирани и врз енергетската инфраструктура во регионот. Десетици нафтени полиња, рафинерии, гасоводи и постројки за течен природен гас биле оштетени за време на конфликтот. Само обновата на дел од катарските капацитети за производство на течен природен гас би можела да трае од три до пет години.
Експертите предупредуваат дека глобалните резерви на нафта постепено се намалуваат и дека во текот на летото светскиот пазар би можел да се соочи со сериозен недостиг. Според нив, доколку резервите продолжат да се трошат, единствениот механизам за намалување на побарувачката ќе бидат повисоки цени.
Некои аналитичари не ја исклучуваат можноста цените на енергенсите дополнително да скокнат, што би можело да предизвика нов бран инфлација и ризик од глобална економска рецесија.
