СВР Штип поднесе кривична пријава против четири лица од Штип поради сомнение за злоупотреба на службена положба и измама при добивање кредит или друга погодност.
Пријавени се Ј.В.(83), В.Џ.(80) и Т.А.(68), поради постоење основи на сомнение дека сториле продолжено кривично дело „злоупотреба на службена положба и овластување“ и продолжено кривично дело „измама при добивање кредит или друга погодност“, како и З.С.(44), која се сомничи за продолжено кривично дело „измама при добивање кредит или друга погодност“.
Според информациите од полицијата, првите тројца, во периодот од септември 2012 до октомври 2024 година, во својство на претседатели на Здружението на инвалиди на трудот – Штип, ги префрлувале дневниците кои четвртопријавената ги заработувала како секретар на здружението на трансакциска сметка на нејзината мајка. Целта била З.С. да не го изгуби правото на социјален детски и образовен додаток.
Дополнително, З.С. со лажно прикажување факти го довела во заблуда новиот претседател на здружението, тврдејќи дека постои долг кон нејзината мајка. Во име на здружението бил склучен договор за отстапување побарување со нејзината мајка, а по нејзината смрт, ист договор бил склучен и со нејзината ќерка.
Истрагата покажала дека првопријавениот и второпријавената вршеле исплати за себе и за други лица за седници кои воопшто не биле одржани, како и еднократна финансиска помош на лица на кои не им следувала таква помош.
Третопријавениот, пак, склучил договор за закуп на станбен простор додека траел јавен оглас, без да бидат разгледани сите поднесени барања. Во повеќе наврати од службената сметка префрлал средства на својата лична трансакциска сметка, а извршил и исплата на правно лице за наводна угостителска услуга.
Со наведените дејствија, првите тројца го оштетиле буџетот на здружението за 297.730 денари, додека на четвртопријавената ѝ овозможиле противправна имотна корист од 88.234 денари.
