Премиерот на Унгарија бара смена на претседателот, Фидес најави протести

Унгарскиот премиер Петер Маѓар покрена постапка за разрешување на претседателот на државата Тамаш Шуљок, поднесувајќи предлог за уставни измени, потег што предизвика остри реакции од опозициската партија Фидес, која повика на протести.

Партијата Тиса на Маѓар, која од април има двотретинско мнозинство во парламентот, предложи измена на Уставот со која би му престанал мандатот на актуелниот претседател. Според парламентарни извори, гласањето би можело да се одржи веќе следната недела.

— реклама —

Маѓар убедливо победи на изборите во април, со што стави крај на 16-годишното владеење на Виктор Орбан. Тој во повеќе наврати го обвини Шуљок дека бил „марионета на Орбан“ и дека не ги извршувал своите уставни обврски, ниту ги штител приврзаниците на опозицијата за време на претходната власт.

— реклама —

Во предлогот за уставни измени се наведува дека мандатот на актуелниот претседател ќе престане со денот на стапување во сила на измените. Со оглед на тоа што Тиса располага со потребното мнозинство, се очекува амандманот да биде усвоен.

Предлогот предвидува и разрешување на четворица уставни судии преку утврдување старосна граница за пензионирање од 70 години, како и ограничување на мандатот на пратениците на најмногу 12 години.

— реклама —

Претседателот Тамаш Шуљок изјави дека нема намера да поднесе оставка и оцени дека иницијативата претставува закана за демократијата и владеењето на правото.

— реклама —

Од Фидес предупредија дека евентуалната смена на претседателот би претставувала опасен преседан и најавија протест во четврток во негова поддршка. Виктор Орбан порача дека гласачите не го дале мандатот за ваков потег.

Во меѓувреме, Европската комисија соопшти дека внимателно ја следи постапката за уставните измени во Унгарија, додека делегација на Венецијанската комисија минатата недела престојуваше во земјата и одржа средби со државниот врв. Нејзините заклучоци сè уште не се објавени.