Пресврт во политиката на САД: Трамп ги одложи нападите врз Иран

Американскиот претседател Доналд Трамп ѝ наредил на американската војска да се воздржи од нови напади врз Иран, со цел да им се даде простор на дипломатските напори за решавање на кризата, објави „Аксиос“, повикувајќи се на извори запознаени со случајот.

— реклама —

Според информациите, во изминатите 13 дена Трамп секојдневно ги одобрувал плановите за напади предложени од Пентагон. Меѓутоа, во петокот, откако добил нов предлог за воена операција, решил да не го одобри и наредил да не се изведуваат нови удари.

— реклама —

Изворите наведуваат дека американскиот претседател смета оти досегашните напади го достигнале својот максимум и дека сега треба да се остави повеќе простор за дипломатско решение.

И покрај тоа, американската војска останува подготвена брзо да ги продолжи операциите доколку добие таква наредба и продолжува да подготвува планови за евентуално обновување на воените дејствија во поголем обем.

— реклама —

Набргу по донесувањето на одлуката, Трамп изјави пред новинарите во Белата куќа дека САД имаат можност повторно да започнат напади или дури и да ги интензивираат, доколку тоа биде потребно.

„Во моментов преговараме со Иран. Целосно сме подготвени за акција, но водиме разговори со нив“, изјави Трамп, додавајќи дека смета оти постигнувањето договор е попаметна стратегија.