Пресврт во преговорите: Иран подготвен да разговара за нуклеарната програма

Иран покажува подготвеност да разговара за делови од својата нуклеарна програма кои досега не биле предмет на преговори, што отвора можност за напредок во напорите за постигнување договор со САД и завршување на војната. Ова го објавува „Блумберг“, повикувајќи се на дипломат запознаен со разговорите.

Според изворот, Техеран ги разгледува предлозите што ги доставил Катар, кој посредува меѓу двете страни. Евентуалните отстапки на Иран би можеле да овозможат значителен напредок во преговорите, кои се во застој по пропаѓањето на привремениот мировен договор во јуни.

— реклама —

Американскиот претседател Доналд Трамп неодамна телефонски разговарал со катарскиот емир Тамим бин Хамад ал Тани за напорите за смирување на тензиите и постигнување сеопфатен договор. Катарски претставници во изминатите денови патувале меѓу Доха и Техеран, обидувајќи се да ги приближат ставовите.

— реклама —

Војната започна кон крајот на февруари со американско-израелски напади врз Иран, по што Техеран возврати со напади врз американските сојузници на Блискиот Исток. Конфликтот предизвика раст на цените на енергентите и забрзување на глобалната инфлација. Преговорите досега повеќепати пропаѓаа, меѓу другото и поради барањето на Иран САД да ја укинат поморската блокада на неговите пристаништа.

Трамп тврди дека целта на војната е да се спречи Иран да произведе нуклеарно оружје, додека Техеран постојано истакнува дека неговата нуклеарна програма има исклучиво мирновременска намена. Претходно и „Ројтерс“ и „Њујорк тајмс“ објавија дека Иран е подготвен на компромис за ова прашање.

— реклама —

По изборите за американскиот Конгрес, на кои демократите ја презедоа контролата, Трамп изјави дека засега нема непосредни планови за нови напади врз Иран. По оваа изјава, цената на нафтата падна, а суровата нафта „Брент“ се спушти под 100 долари за барел, првпат од септември.

— реклама —

Во меѓувреме, иранскиот министер за надворешни работи Абас Арагчи разговарал телефонски со колегите од Саудиска Арабија и Катар за напорите за стабилизација на регионот, а контактирал и со претставници на Обединетите Арапски Емирати, Турција, Кувајт, Кипар и Јордан.

Паралелно, секретарот на Врховниот совет за национална безбедност на Иран, Мохсен Резаи, во Москва се сретнал со рускиот претседател Владимир Путин и му пренел порака од иранскиот врховен водач Моџтаба Хамнеи.