Претседателката на ЛДП, Моника Зајкова, избрана за потпретседателка на Парламентарното собрание на ОБСЕ

Претседателката на Либерално-демократската партија (ЛДП) и пратеничка во Собранието, Моника Зајкова, е избрана за потпретседателка на Парламентарното собрание на ОБСЕ на 33. годишна сесија на организацијата, што се одржа во Хаг, Холандија.

— реклама —

Според ЛДП, Зајкова ја добила довербата на парламентарните делегации од 57 земји членки на ОБСЕ, а изборот бил спроведен со тајно гласање во конкуренција со кандидати од повеќе држави.

По изборот, Зајкова изјави дека ова претставува значајно меѓународно признание не само за неа, туку и за државата.

— реклама —

„Ова е успех за Македонија и доказ дека можеме рамноправно да се натпреваруваме и да ја заслужиме довербата на меѓународната заедница. Благодарна сум за поддршката од колегите од 57-те земји членки на ОБСЕ и за единството што го покажа македонската делегација“, истакна Зајкова.

— реклама —

Таа додаде дека и во новата функција ќе се залага за унапредување на демократските процеси, парламентарната соработка и развојот на механизми за мирно решавање на конфликтите.

Потпретседателите на Парламентарното собрание на ОБСЕ се избираат со мандат од три години и се дел од највисокото раководство на организацијата, која обединува парламентарци од земјите членки на ОБСЕ.

— реклама —

Од ЛДП оценуваат дека изборот на Зајкова претставува значајно меѓународно признание и придонесува за поголема видливост на Македонија во рамките на парламентарната дипломатија.