При крај изградбата на Дневниот центар за лица со попреченост во Кавадарци, инвестицијата над 40 милиони денари

Изградбата на Дневниот центар за лица со телесна или ментална попреченост во Кавадарци е во завршна фаза, информира градоначалникот на општината, Митко Јанчев.

Паралелно со завршните градежни активности, се работи и на партерното уредување на просторот околу објектот, со цел да се обезбеди уредна, пристапна и функционална средина за идните корисници.

— реклама —

Според информациите објавени од Јанчев, Дневниот центар ќе има капацитет за 40 корисници, а вкупната проценета вредност на проектот изнесува 40.856.910 денари.

— реклама —

Реализацијата на овој проект претставува значаен чекор кон подобрување на условите за грижа и поддршка на лицата со попреченост, како и кон нивно поголемо вклучување во општествениот живот.

Од Општината посочуваат дека со ваквите инвестиции се создаваат услови за поинклузивна заедница, во која сите граѓани ќе имаат можност за соодветна поддршка и еднаков пристап до услугите.

— реклама —

„Продолжуваме да градиме Кавадарци како општина на еднакви можности, грижа и поддршка за сите граѓани“, порачува градоначалникот Митко Јанчев.