Примирјето под знак прашалник: САД и Иран повторно во воена пресметка

Тензиите меѓу САД и Иран повторно се зголемуваат откако двете страни пријавија нови меѓусебни напади и покрај формално важечкото примирје, додека Кувајт соопшти дека пресретнал ракети и беспилотни летала над својата територија.

Американската армија објави дека извршила напади врз радарски системи и центри за контрола на дронови во јужен Иран. Според Централната команда на САД, цел на операцијата биле објекти во близина на градот Горук и островот Кешм кај Ормускиот Теснец. Од Вашингтон наведуваат дека станува збор за самоодбранбени дејствија како одговор на, како што велат, претходни агресивни потези на Иран.

— реклама —

Од друга страна, иранската Револуционерна гарда соопшти дека нападнала база која, според нив, била користена од американската војска за операции против Иран. Детали за локацијата на базата не беа објавени.

— реклама —

Во меѓувреме, американскиот претседател Доналд Трамп изјави дека Техеран и натаму е заинтересиран за постигнување договор со Вашингтон.

„Иран навистина сака да склучи договор, а тој ќе биде добар за САД и за нашите сојузници“, напиша Трамп на социјалната мрежа „Трут Соушл“.

— реклама —

Дополнителна загриженост предизвика соопштението на кувајтската армија дека нејзините системи за противвоздушна одбрана пресретнале ракети и дронови, по што во земјата биле активирани сирени за воздушна опасност. Властите не открија од каде биле истрелани проектилите ниту која била нивната крајна цел.

Кувајт, каде што се распоредени и американски воени сили, се наоѓа во чувствителна позиција поради конфликтот што трае од крајот на февруари, кога започнаа американско-израелските напади врз Иран. Оттогаш, иранските сили во повеќе наврати извршија ракетни и беспилотни напади кон цели во регионот на Персискиот Залив.

Новите инциденти дополнително ги зголемуваат стравувањата од поширока ескалација на конфликтот во регионот, и покрај дипломатските напори за продолжување на примирјето и постигнување политички договор.