Природните катастрофи што ја погодија Кина во текот на август предизвикале директна економска штета од 36,03 милијарди јуани, односно околу 4,7 милијарди евра, соопшти кинеското Министерство за управување со вонредни состојби.
Во катастрофите во текот на месецот загинале или се водат како исчезнати 595 лица, додека биле погодени вкупно 12,62 милиони луѓе. Штетите опфатиле и 857.400 хектари земјоделски површини.
Најголем дел од материјалната штета ја предизвикал тајфунот „Долфин“, кој според кинеските власти бил најсилниот тајфун што годинава ја погодил земјата. Штетата од невремето изнесувала 28,26 милијарди јуани, што претставува околу 78 отсто од вкупната штета регистрирана во август.
Од четирите тајфуни што во текот на август го погодиле кинеското копно, „Долфин“ имал најшироко влијание. Невремето погодило 8,8 милиони луѓе и предизвикало штети на 365.900 хектари земјоделски површини.
Во истиот период, поплави и свлечиште го погодиле и граничниот премин што го поврзува кинескиот автономен регион Тибет со Непал. Во катастрофата во двете земји загинале повеќе од 1.400 луѓе.
Кинеското Министерство соопшти дека последиците од оваа катастрофа, предизвикана од уривање на глечер, сè уште се проценуваат. Според најновите официјални податоци од Кина, во свлечиштето загинале 43 лица, додека 519 лица и натаму се водат како исчезнати.
„Поплави над предупредувачкото ниво се појавуваа низ целата земја почесто од вообичаено, додека геолошките катастрофи беа особено чести во западните делови на земјата“, наведува кинеското Министерство за управување со вонредни состојби.
