Пристигна првата испорака од 3.300 нови контејнери за Скопје, почнува нивното распоредување

Првата испорака од вкупно 3.300 нови контејнери пристигна во Скопје, а нивното распоредување низ градот започнува денеска. Градоначалникот Орце Ѓорѓиевски соопшти дека станува збор за најголемата набавка на контејнери во историјата на градот.

Со новата опрема ќе бидат заменети скршените и дотраени контејнери, а ќе се зголеми и бројот на места за правилно одлагање на отпадот. Ѓорѓиевски најави дека следната недела во работа ќе бидат пуштени и новите камиони, со што треба да се подобрат собирањето на сметот и одржувањето на хигиената во скопските населби.

— реклама —

Тој посочи дека контејнерите се набавени по двојно пониска цена во споредба со претходните набавки. Според неговите наводи, неговите претходници плаќале по 18.600 денари за истите контејнери.

— реклама —

Дополнително, обезбедени се и 60 контејнери за селекција на стакло, со цел да се овозможи негово одделно собирање и рециклирање, а со тоа да се намали количеството мешан отпад и да се придонесе за заштита на животната средина.

Ѓорѓиевски упати апел до граѓаните да ја чуваат новата опрема и да не оставаат градежен шут и кабаст отпад во или покрај контејнерите. Тој предупреди дека ваквото однесување ги оштетува садовите за отпад, го отежнува собирањето на сметот и придонесува за создавање диви депонии во населбите.

— реклама —

Градоначалникот порача дека со новата опрема се преземаат чекори за почисто и поуредено Скопје, но дека за одржувањето на хигиената е потребна и одговорност од граѓаните.