Вчера пo наредба од судија на претходна постапка за организиран криминал беше уапсен Владимир Атанасовски, поранешниот директор на УБК, на кого му е одреден триесетдневен притвор.
Тој беше изнесен пред суд на распит, поради сведочењето на браќата Стефан и Михаил Младеновски кои го посочија како главен организатор за насилниот упад во Собранието на 27 април и како нарачател на насилства врз припадници на тогашната опозиција.
– Постои основано сомнение дека лицето сторило кривично дело Здружување заради непријателска дејност од чл. 324 ст.1 од Кривичниот законик. Надлежен обвинител до судија на претходна постапка достави Предлог за определување на мерка притвор, соопшти ЈОРМ.
Владимир Атанасовски беше назначен за директор на УБК во септември 2016 година по оставката на Сашо Мијалков. На директорското место во тајната полиција остана до јуни 2017 година, по што беше ангажиран како советник за безбедност на лидерот на ВМРО – ДПМНЕ Христијан Мицкоски.
