Основното јавно обвинителство во Штип донесе наредба за спроведување истражна постапка против едно лице, осомничено за извршување други полови дејствија врз 16-годишно девојче.
Според информациите од Обвинителството, на 18 јуни девојчето се движело по пешачката патека покрај реката Брегалница во Штип, кога осомничениот започнал да ја следи.
Чувствувајќи се непријатно, малолетничката седнала на клупа, очекувајќи дека мажот ќе продолжи по својот пат. Наместо тоа, осомничениот седнал до неа и почнал да ја вознемирува и да ја принудува на други полови дејствија.
Исплашена, девојката успеала да го оттурне од себе и да избега.
Поради опасност од бегство, можност за влијание врз оштетената, како и опасност од повторување на делото, јавниот обвинител до судијата на претходна постапка доставил предлог за определување мерка притвор за осомничениот.
Истрагата за случајот е во тек.
