Приведен сопственикот на „Алта банка“ во Белград, Давор Мацура

Сопственикот на „Алта банка“ во Белград, Давор Мацура, бил приведен во текот на ноќта, објавија српските медиуми, откако на банката претходно ѝ била одземена дозволата за работа и бил прогласен стечај.

— реклама —

Народната банка на Србија поднела кривична пријава до Јавното обвинителство за организиран криминал против правното лице „Алта банка“ и повеќе одговорни лица во банката.

Од Обвинителството соопштиле дека пријавата им била доставена по електронска пошта, по што од Министерството за внатрешни работи и Службата за борба против организиран криминал било побарано итно да ги проверат целокупното работење на банката и околностите што довеле до одземање на дозволата.

— реклама —

Обвинителството уште на 27 октомври побарало од Народната банка на Србија податоци за сите трансакции кон странство во периодот од 27 септември до денот на доставувањето на извештајот. Барањето било испратено по објавите во медиумите и на социјалните мрежи за одлив на средства од сметка на една банка кон странство.

— реклама —

На 30 октомври Народната банка доставила податоци од своите квартални извештаи, кои опфаќале период до 20 септември. За подоцнежниот период, од централната банка навеле дека извештајот ќе можат да го достават по 4 ноември.

Дополнително, на 29 октомври било побарано да се соберат информации за конверзијата и одливот на парични средства од сметките на „Алта банка“ кон странство. Ден подоцна, Обвинителството побарало од Службата за борба против организиран криминал да го провери работењето на банката, како и постапувањето на одговорните лица во Народната банка во врска со евентуалните одливи и трансфери.

— реклама —

Извршниот одбор на Народната банка на Србија донел одлука за одземање на дозволата за работа на „Алта банка“. Од централната банка претходно соопштиле дека Агенцијата за осигурување на депозити ќе биде именувана за стечаен управник со судско решение.