Фејсбук, Инстаграм и Месенџер денес повторно се соочија со технички проблеми, што претставува втор поголем прекин на услугите на Мета во последните три дена.
Според платформата „Даундетектор“, која ги следи прекините на интернет-услугите во реално време, повеќе од 3.600 корисници пријавиле проблеми со трите платформи. Најголем број пријави за Фејсбук биле регистрирани околу 13 часот.
Корисниците најчесто пријавувале тешкотии при најавување, користење на апликациите и пристап до веб-страниците. На Инстаграм биле пријавени проблеми со апликацијата и поврзувањето со серверите, додека дел од корисниците на Месенџер пријавиле дека не можат да испраќаат или примаат пораки.
Незадоволните корисници своето незадоволство го изразија и на социјалната мрежа Икс, каде што многумина коментираа дека ова е втор ваков прекин за само неколку дена.
Сличен пад на услугите беше регистриран и во неделата, кога дел од корисниците беа автоматски одјавени од своите профили и добија порака дека нивните сметки се недостапни поради технички проблем.
Фејсбук, Инстаграм и Месенџер се во сопственост на компанијата Мета, предводена од извршниот директор Марк Закерберг. Засега не е познато кога проблемот ќе биде целосно отстранет.
