По 30 дена зад решетки добија четворицата кои ги гонат за убиствата во Ѓорче Петров

Четворицата осомничени за двата случаи на разбојништво со смртни последици во скопските населби Хром и Ѓорче Петров добија продолжување на притворот за уште 30 дена, информираат од Кривичниот суд.

— реклама —

Станува збор за четири лица кои претходно беа приведени и задржани во 48-часовен притвор, а се поврзуваат со убиствата на две лица во нивните домови во скопските населби Хром и Ѓорче Петров.

Обвинителството во меѓувреме продолжува со прибирање докази за двата случаи, кои се истражуваат како разбојништва со смртни последици.

— реклама —

Според претходните информации од Обвинителството, се преземаат истражни дејствија, а во тек се и ДНК-вештачења, чии резултати треба да бидат дел од доказниот материјал.

— реклама —

Во врска со двата случаи беа приведени А.С. (22), Х.Е. (20) и К.А. (58), сите од Скопје, како и М.Р. (26) од Струмица. Полицијата ги поврза со двата настана.

Првиот случај беше откриен на 22 октомври во скопската населба Хром, каде што во својот дом беше пронајден починат 62-годишниот С.Ј., со траги од насилство.

Неколку дена подоцна, на 27 октомври, во куќа на улицата „Ѓурчин Кокале“ во Ѓорче Петров беше пронајдена почината и 76-годишната О.А., исто така со траги од насилство.