Судењето за случајот „Државна лотарија“ денеска треба да продолжи во Основниот кривичен суд Скопје, откако минатата недела на властите им се предаде првообвинетиот Перпарим Бајрами, поранешен директор на Државна лотарија.
Бајрами, по кого беше распишана меѓународна потерница откако ја напушти земјата, на 9 септември сам се предаде на граничниот премин „Блаце“. Потоа беше спроведен во затворот во Скопје, каде што ја издржува претходно определената мерка притвор.
Во предметот, покрај Бајрами, обвинети се и поранешниот вицепремиер Артан Груби, Методија Димевски, Скендер Мехмети, Бојан Јанев, Фатмир Рамадановски, Александар Димитриоски и Башким Авдиу.
На првото рочиште, одржано минатата недела, обвинетите се изјаснија дека не се виновни. Бајрами тогаш не беше присутен бидејќи беше недостапен за органите на прогонот, додека Авдиу рече дека не го разбира обвинението и побара да му биде доставено во писмена форма на неговиот мајчин, албански јазик.
Обвинението го застапуваат јавните обвинители Даниел Коцев и Александар Давчевски. Според обвинението, во текот на 2023 и 2024 година обвинетите ги пречекориле службените овластувања, со што, како што се наведува, била предизвикана штета на „Државна лотарија“ од 596.125.511 денари.
