Центарот за јавно здравје Тетово – Епидемиолошката служба во Гостивар попладнево прогласи епидемија на подрачјето на Општина Гостивар, поради зголемениот број заболени од стомачни инфекции, објави порталот „Гостиварпрес“.
„Поради зголемен број заболени и надминување на лимитот на неделно ниво, пријавуваме епидемија на подрачјето на Гостивар. Редовно ја следиме состојбата, анкетираме заболени пациенти и се преземаат мерки“, информираа од Епидемиолошката служба.
Здравствените власти посочуваат дека состојбата и понатаму се следи на дневно ниво, а бројот на заболени со стомачни инфекции продолжува да расте.
Во изминатите 24 часа на Инфективното одделение во гостиварската болница биле прегледани околу 200 пациенти, додека на Одделението за педијатрија биле прегледани уште околу 110 деца. Најголем дел од нив имале симптоми како дијареја, повраќање и дехидрација.
Во истиот период, медицинска помош во Итната медицинска служба побарале вкупно 290 лица.
