Трагичен настан го потресе Родополис, во близина на Атина, откако во дворот на храмот „Свети Пророк Илија“ било пронајдено безживотното тело на 53-годишен член на црковниот хор.
Мажот бил пронајден во монтажен објект во рамките на црковниот двор, со тешка повреда во пределот на вратот, нанесена со нож. Според првичните полициски наоди, постои сомнение дека станува збор за самоубиство.
53-годишниот маж бил добро познат меѓу локалните верници. Тој бил член на црковниот хор, не бил оженет и немал деца. Поради неговите тешки животни и психолошки проблеми, парохијата претходно му помогнала и му овозможила привремено да престојува во црковниот двор.
Парохискиот свештеник, протојереј-ставрофор Јован Хрисакис, за грчкиот портал eDionysos.gr потврдил дека починатиот бил дел од црковниот хор и дека црквата се обидувала да му помогне во тешкиот период.
„Шокирани сме од неговата смрт. Се чини дека ова е јасен случај на самоубиство. За жал, тој не можел да го издржи тоа и решил да го заврши својот живот на овој ужасен начин“, изјавил отец Јован.
Свештеникот открил дека претходно го упатил кај психолог, а околу две недели пред трагичниот настан му бил закажан и преглед кај психијатар. Сепак, прегледот не се одржал.
„Нека Бог ја упокои неговата душа“, изјавил свештеникот со длабока тага.
