Samsung ненамерно ги откри речиси сите детали за својот нов паметен телефон Galaxy A27, откако накратко се појави официјалната страница за уредот на чешката веб-страница на компанијата.
Според објавените информации, Galaxy A27 ќе располага со 6,7-инчен Super AMOLED екран со Full HD+ резолуција и стапка на освежување до 120 Hz. Уредот ќе го придвижува процесорот Snapdragon 6 Gen 3, што претставува подобрување во однос на претходната генерација.
На задната страна ќе има тројна камера составена од главен сензор од 50 мегапиксели, ултраширока камера од 5 мегапиксели и макро сензор од 2 мегапиксели. За селфи фотографии ќе биде задолжена предна камера од 12 мегапиксели.
Galaxy A27 ќе биде достапен со 6 GB RAM меморија и 128 GB или 256 GB внатрешна меморија, со можност за проширување преку microSD картичка, пренесува SamMobile.
Телефонот ќе пристигне со Android 16 и корисничкиот интерфејс One UI 8.5. Дополнително, се очекува Samsung да понуди дури шест генерации Android надградби и шест години безбедносни ажурирања.
Особено внимание привлече можната поддршка за Samsung DeX – функција која досега главно беше резервирана за поскапите модели од понудата на компанијата.
Батеријата ќе има капацитет од 5.000 mAh и ќе поддржува брзо полнење од 25W. Според протечените информации, Galaxy A27 ќе биде достапен во црна, сина, светлозелена и розова боја, а почетната цена за верзијата со 128 GB меморија ќе изнесува 349 евра.
