Samsung би можел да подготвува големо освежување на својата премиум серија смартфони, а покрај моделите Galaxy S27, Galaxy S27+ и Galaxy S27 Ultra, според најновите гласини, во јануари би можел да дебитира и целосно новиот Galaxy S27 Pro.
Според информациите на инсајдерите, Galaxy S27 Pro би бил своевиден „помал Ultra“ модел, но без препознатливото S Pen пенкало. Уредот наводно ќе има екран од 6,47 инчи, а главната и ултрашироката камера би биле идентични со оние кај Ultra верзијата, додека телефото-сензорот би бил различен.
Најголемо изненадување, сепак, е батеријата. Иако се очекуваше покомпактниот модел да добие помал капацитет, отстранувањето на S Pen ослободило дополнителен простор во внатрешноста на уредот.
Според новите информации објавени од извор на социјалната мрежа X, Galaxy S27 Pro би можел да биде опремен со батерија од 5.000 mAh – ист капацитет каков што има актуелниот Galaxy S26 Ultra, а според гласините, ќе го задржи и неговиот наследник.
Иако батерија од 5.000 mAh веќе не претставува рекорд во индустријата, особено во споредба со некои кинески производители на паметни телефони, за корисниците на Samsung ова би можело да биде значајно подобрување, особено ако се комбинира со покомпактен дизајн и премиум спецификации.
Сепак, станува збор за неофицијални информации и деталите треба да се земат со резерва сè додека Samsung официјално не ја претстави новата генерација уреди.
