Протести во Мадрид поради мигрантите во Сеута, бараат оставка од Санчез

Илјадници луѓе со шпански знамиња денеска излегоа на улиците во центарот на Мадрид, протестирајќи против начинот на кој владата на премиерот Педро Санчез се справува со состојбата во шпанската енклава Сеута во северна Африка.

— реклама —

Протестот го организираше конзервативната платформа „Sociedad Civil Española“ под мотото „За достоинството и одбраната на Шпанија“. Демонстрантите побараа оставка од премиерот и распишување предвремени парламентарни избори.

— реклама —

На протестот присуствуваа и лидери на опозициските десничарски партии, Народна партија (PP) и Вокс. Лидерот на Вокс, Сантијаго Абаскал, пред насобраните изјави дека Сеута и понатаму се соочува со сериозна состојба и упати остри критики кон владата на Санчез.

Демонстрантите се упатија кон Триумфалната капија, во близина на зградата на владата, во период кога прашањето за состојбата во Сеута предизвикува засилени политички и општествени реакции.

— реклама —

Во Сеута и понатаму има голем број мигранти кои пристигнале во градот за време на масовниот прилив кон крајот на јули. Околу 8.300 мигранти се сместени во различни прифатни центри, додека се проценува дека околу 4.000 и понатаму престојуваат на улиците и плажите.

На почетокот на септември, за време на официјалниот Ден на Сеута, илјадници луѓе протестираа на повеќе места низ Шпанија во знак на поддршка на жителите на енклавата.