Во Јапонија пристигна првиот нафтен танкер кој од почетокот на војната со Иран поминал низ Ормускиот Теснец, повеќе од 12 недели по избувнувањето на конфликтот.
Танкерот „Идемицу Мару“, кој плови под панамско знаме, вчера пристигнал во пристаништето Чита на островот Хоншу, откако уште во април успешно минал низ теснецот.
Главниот секретар на јапонската влада, Минору Кихара, изјави дека пристигнувањето на бродот е добра вест за стабилното снабдување со енергенси.
Јапонија во голема мера зависи од нафтата од Персискиот Залив, а последните месеци активираше рекордни количества од своите стратешки резерви за да го ублажи растот на цените.
Според Кихара, во Заливот сѐ уште се блокирани 39 бродови поврзани со Јапонија, а на еден од нив има и јапонски членови на екипажот. Тој додаде дека Токио вложува дипломатски напори за овозможување безбеден премин низ Ормускиот Теснец.
Јапонската телевизија NHK, повикувајќи се на информации од компанијата, објави дека танкерот превезол два милиони барели сурова нафта во префектурата Аичи, индустриски центар на земјата.
Нафтата ќе биде преработена во деривати, а со танкерот управува подружница на големата рафинериска компанија Idemitsu Kosan.
