Тимот на „ББ Класик Карс“ со кодно име „ЗАС Г20“ денеска го претстави првиот македонски електричен автомобил.
„ЗАС Г20“ претставува проект реализиран од страна на тимот на „ББ Класик Карс“, со финансиска поддршка од Фондот за иновации и технолошки развој и со поддршка на повеќе специјализирани фирми и занаетчии, а е насловен „Замена на мотор со внатрешно согорување на класичен автомобил „фиќо“, со електричен мотор“ .
Според претставникот од „ББ Класик Карс“, Ален Јегени, возилото има нулта емисија на јаглероден диоксид, досега со едно полнење до 150 километри во реални услови на возење, како и максимална брзина до 130 километри на час.
Времето на полнење изнесува три-пет часа на домашен мрежен приклучок, исто толку и на јавен наизменичен приклучок, а на јавен брз еднонасочен полнач доволни се 15 минути.
Според Тимот на „ББ Класик Карс“ електричното возило ЗАС може да се модифицира врз неколку модели: G20 – класично градско возило, TC20 – градско возило со спортски изглед, TCR20 – спортско возило за град, TCR50 – спортско возило за натпревари и дека времето за испорака е околу два месеци од дефинирањето на нарачката.
