Изградбата на автопатот Прилеп–Битола се одвива со засилено темпо, а првите целосно завршени километри се очекува да бидат готови во текот на 2027 година. Целата делница треба да биде завршена до крајот на 2029 година, најави министерот за транспорт и заменик-претседател на Владата, Александар Николоски, при работната посета на Прилеп.
Николоски посочи дека во текот на летото на терен се бележи добра динамика, а првите километри што ќе бидат пуштени во употреба треба да бидат целосно завршени, со сите предвидени елементи на автопатската инфраструктура.
Според најавите, тоа значи целосно изградена траса во двете насоки, со по три ленти, како и помошни патишта. Крајниот рок за завршување на целиот автопат останува крајот на 2029 година.
Покрај изградбата на автопатот, во Општина Прилеп преку различни владини програми се реализираат инфраструктурни проекти во вредност од околу 580 милиони денари, односно околу 9,5 милиони евра. Средствата се наменети за нови улици, подобрување на водоводната и канализациската мрежа и други проекти поврзани со урбаниот развој.
Во Прилеп се гради и зграда со социјални станови, за која се издвојуваат околу 1,5 милиони евра преку Јавното претпријатие за стопанисување со станбен и деловен простор. Објектот треба да биде завршен до крајот на годинава, по што становите треба да бидат распределени и семејствата да се вселат до пролет.
На работната посета беа и премиерот Христијан Мицкоски и градоначалникот Дејан Проданоски, кои извршија увид во повеќе инфраструктурни проекти.
Мицкоски посочи дека преку владината програма за децентрализација на средствата од централниот буџет кон општините, во Прилеп се реализираат проекти вредни повеќе од 12 милиони евра. Според него, во цела Македонија во моментов има повеќе од 1.200 градилишта како резултат на оваа програма.
