Три лица се убиени, а едно е во критична состојба по пукање што се случило во неделата вечерта во Исла Кристина, на југот на Шпанија. Меѓу жртвите се бремена жена, нејзиниот син и нејзината мајка, објави „Еуроњуз“.
Според локалните медиуми, напаѓачот со мотор пристигнал пред семејниот дом во областа Росио, по што отворил оган врз членовите на семејството и избегал. Телата на тројцата убиени биле пронајдени на улица, додека четвртото лице со тешки повреди било пренесено во болница.
Полицијата го истражува случајот како можна семејна одмазда. Истражителите го поврзуваат нападот со конфликт меѓу две семејства што започнал во септември минатата година, кога во Хуелва бил убиен еден маж.
Трите жртви во најновиот напад, според истрагата, биле блиски роднини на осомничениот за тоа убиство – неговата сестра, мајка и внук.
Двете семејства оттогаш биле инволвирани во повеќе насилни конфликти, а во истата област на Исла Кристина претходно било регистрирано и пукање. Поради тоа, главната верзија на истражителите е дека најновиот напад бил одмазда за претходното убиство.
Цивилната гарда и локалната полиција спроведуваат опсежна потрага по напаѓачот, кој сè уште е во бегство. Во пошироката област се распоредени засилени полициски сили, а истрагата продолжува.
