Пуштена клучката кај Требеништа - Николоски најави нов автопат кон Ќафасан

Министерот за транспорт Александар Николоски изјави дека пуштањето во сообраќај на клучката кај Требеништа претставува прв конкретен чекор кон реализација на идниот автопат од Требеништа до Ќафасан, нагласувајќи дека со тоа државата создава предуслови за долгорочен инфраструктурен развој.

— реклама —

— реклама —

— реклама —

„Од вчера во сообраќај ја ставивме клучката кај Требеништа. Тоа е клучка од која треба да почнува новиот автопат од Требеништа до Ќафасан и тоа е најдобар доказ дека оваа влада е посветена да го изгради и тој автопат. Во спротивно, не би ја граделе таа клучка и не би ги трошеле парите таму.

Оттука е проектиран и автопат за Битола, кој не е реално да го изгради оваа влада во овој мандат, но можеби некоја идна влада ќе се реши да гради и автопат кој би одел од Требеништа преку едно тунелско поврзување Косел–Ресен и Битола. Така што, за идните генерации оставаме подготвена документација, но и подготвен терен; треба буквално само да се направи спојка тука и во иднина некои други генерации да го изградат и тој автопат“, изјави Николоски.