Рускиот претседател Владимир Путин оцени дека политичките промени во Европа, вклучително и изборниот успех на Алтернатива за Германија (АфД), се последица на, како што рече, „системски грешки“ на западните глобалистички елити во политиката, безбедноста и економијата.
Путин говореше пред новинарите во текот на првиот ден од посетата на Индија, каде што пристигна за самитот на БРИКС.
„Мислам дека сè што сега се случува во Европа, во суштина, е резултат на системските грешки на таканаречениот Запад, на западните глобалисти во политиката, безбедноста и економијата“, рече Путин.
Изјавата следува по убедливата победа на АфД на изборите во источната германска покраина Саксонија-Анхалт, која има околу 2,14 милиони жители. Партијата, сепак, не освои доволно за самостојно да формира покраинска влада.
Путин првично рече дека нема да ги коментира конкретно резултатите на АфД, но потоа ги поврза изборните движења во Германија и пошироко во Европа со политиките што ги воделе западните влади.
„Мислам дека луѓето во Европа разбираат што се случува. Затоа денес имаме такви резултати во Германија и такви тенденции низ цела Европа“, изјави рускиот претседател.
Тој повторно ја изложи и руската позиција за војната во Украина, обвинувајќи го Западот дека со долгогодишното приближување на Украина кон НАТО ги игнорирал руските противења на проширувањето на Алијансата кон исток.
Според Путин, по заминувањето на прорускиот украински претседател од власта во 2014 година, западните земји поставиле цел Украина да стане дел од НАТО.
„Тоа на крајот се покажа како главна причина за денешните трагични настани во Украина“, тврдеше Путин.
Тој ги обвини западните политички елити дека се обидуваат одговорноста за војната да ја префрлат врз Москва.
„Западните глобалистички елити се виновни за ова, иако постојано се обидуваат вината да ја префрлат врз нас“, рече Путин.
Рускиот претседател истовремено ги обвини западните влади дека ги плашат своите граѓани со, како што ја нарече, „лажната закана од Русија“.
„Таква закана не постои, ниту некогаш постоела“, рече Путин.
Неговите тврдења за причините за војната се во спротивност со позицијата на Украина и нејзините западни сојузници, кои Русија ја сметаат за одговорна за воената агресија и инвазијата врз Украина.
Путин престојува во Њу Делхи по повод самитот на БРИКС, кој е фокусиран на трговијата, технологијата и регионалните конфликти. На собирот учествува и кинескиот претседател Си Џинпинг.
БРИКС првично го сочинуваа Бразил, Русија, Индија, Кина и Јужна Африка, а блокот во меѓувреме се прошири и со Иран, Египет, Етиопија, Обединетите Арапски Емирати и Индонезија.
