Путин: Резултатите од изборите покажаа дека Русите ја поддржуваат нашата политика

Претседателот на Русија, Владимир Путин, изјави дека резултатите од првите парламентарни избори во земјата по почетокот на војната во Украина покажуваат поддршка за неговата политика.

По преброени повеќе од 97 отсто од гласовите од тридневното гласање, изборната комисија соопшти дека партијата Единствена Русија ќе освои повеќе од три четвртини од местата во Државната дума.

— реклама —

Според објавените резултати, Единствена Русија освои нешто помалку од 58 отсто од гласовите за 225 места што се распределуваат според партиските листи, а победи и во 208 од 225 едномандатни изборни единици. Така, партијата би требало да има меѓу 347 и 355 пратеници во Думата, која има вкупно 450 места.

На изборите гласале повеќе од 59 отсто од 111 милиони регистрирани избирачи. Гласањето траело три дена, а во дел од регионите било овозможено и електронско гласање.

— реклама —

Изборите се одржаа во услови на продолжени украински напади со беспилотни летала. Руското Министерство за одбрана соопшти дека во текот на една ноќ биле соборени 1.110 беспилотни летала, додека градоначалникот на Москва, Сергеј Собјанин, изјави дека 450 од нив биле соборени при приближувањето кон главниот град.

Според официјалните информации, во поширокото подрачје на Москва биле оштетени рафинерија за нафта и станбена зграда, а загинале три лица, додека 38 биле повредени.

— реклама —

Ова беа првите парламентарни избори во Русија откако Путин во 2022 година ја започна инвазијата врз Украина. За првпат на нив учествувале и жители на четири украински области што Москва ги зазеде и подоцна ги прогласи за припоени кон Русија. Гласањето на тие подрачја Украина го прогласи за незаконско.

Гласало и населението на Крим, кој Русија го анектираше во 2014 година. Путин во обраќањето по изборите им се заблагодари и на руските војници што се борат во Украина, наведувајќи дека резултатот претставува глас за нив.

Преостанатите места во Думата главно ќе ги пополнат неколку помали партии од таканаречената системска опозиција, додека само неколку мандати се очекува да им припаднат на независни кандидати.

Партијата Јаблоко, единствената регистрирана политичка опција што јавно го критикувала воениот конфликт, минатиот месец била отстранета од гласачките ливчиња со одлука на Врховниот суд на Русија. Според првичните резултати, ниту еден од нејзините кандидати не освоил пратенички мандат.