Радичевски: Сплотени и обединети со конкретни проекти да продолжиме да ја градиме и развиваме Брвеница, за подобри услови за сите жители

На митинг во општина Брвеница, кандидатот за градоначалник од ВМРО-ДПМНЕ, Стојанчо Радичевски, ја претстави својата програма за претстојните вонредни локални избори и побара поддршка од граѓаните за реализација на најавените проекти.

Радичевски порача дека неговата програма се темели на продолжување на започнатите активности, со акцент на инфраструктурата, локалниот економски развој, младите, социјалната заштита и дигитализацијата на општинските услуги.

— реклама —

„Ова е избор помеѓу продолжување на работата и враќање наназад, помеѓу транспарентност и неизвесност. Затоа ве повикувам на единство, да ги завршиме проектите за подобри улици, подобри училишта, подобри услови за секое семејство во нашата општина“, рече Радичевски.

Во инфраструктурниот дел од програмата тој најави изградба, реконструкција и рехабилитација на локални патишта во Челопек, Теново, Стенче, Волковија и Блаце, како и доизградба на канализациски мрежи во Седларце, Брвеница, Челопек, Блаце и Милетино.

— реклама —

Меѓу најавените проекти се и доградба и реконструкција на општинската зграда, изградба на систем за водоснабдување во Челопек и развој на инфраструктурата во индустриската зона „Брвеница“, со цел, како што посочи Радичевски, да се создадат услови за нови инвестиции и работни места.

— реклама —

За младите и локалната економија, тој најави локален иновациски фонд „Млади со идеи“, бизнис-инкубатор „Мој бизнис, моја општина“, центар за знаење и практични вештини, како и програми за поддршка на женското претприемништво и руралниот развој.

Во социјалниот дел од програмата се предвидуваат изградба на нова детска градинка во Челопек, доградба на градинката во Брвеница и отворање дом за стари лица со капацитет до 50 корисници. Радичевски најави и инвестиции во енергетска ефикасност и пристапност на училиштата за децата со посебни потреби.

Во областа на дигитализацијата, кандидатот најави бесплатен интернет на јавни места, платформа за електронски услуги, систем на отворени податоци и платформа „Ти си дел од процесот“, преку која граѓаните би учествувале во донесувањето одлуки.

Радичевски на крајот ги повика граѓаните да ја поддржат неговата кандидатура и програмата на предвремените локални избори, со порака „Една Брвеница за сите! Да ја сочуваме силата на единството“.