Радичевски: Продолжуваме посветено и транспарентно да работиме за Брвеница

Кандидатот за градоначалник на општина Брвеница од ВМРО-ДПМНЕ, Стојанчо Радичевски, на митинг во Милетино ја претстави својата визија за развој на општината и дел од проектите предвидени во неговата програма.

Радичевски порача дека кампањата ја започнува со почит, достоинство и човечност, нагласувајќи дека проектите треба да се реализираат јавно, транспарентно и во интерес на граѓаните.

— реклама —

„Брвеница е наша и заедничка. Нејзината иднина не смее да зависи од тоа кој за кого гласал. Градоначалникот мора да биде градоначалник на сите жители“, рече Радичевски.

— реклама —

Тој истакна дека по изборите граѓаните остануваат соседи, пријатели и една заедница, а за реализација на проектите, како што наведе, потребна е соработка со локалната и централната власт.

Меѓу проектите што ги претстави се доизградба и реконструкција на општинската зграда, изградба на систем за водоснабдување во Челопек и развој на инфраструктурата во индустриската зона Брвеница.

— реклама —

За младите, Радичевски најави локален иновациски фонд „Млади со идеи“, бизнис-инкубатор „Мој бизнис, моја општина“, Центар за знаење и практични вештини, како и програми за поддршка на женското претприемништво и руралниот развој.

Во програмата, како што посочи, се предвидени и изградба на нова детска градинка во Челопек, која е во фаза на реализација, доградба на градинката во Брвеница, како и отворање дом за стари лица со капацитет до 50 корисници.

Радичевски најави и инвестиции во енергетската ефикасност и подобрување на пристапноста до училиштата за децата со посебни потреби.